Lagerback hlakkar til að fara til Hollands.
Lars Lagerback, landsliðsþjálfari Íslands, er spenntur fyrir næsta landsleik gegn Hollandi í undankeppni EM 2016. Hann fer fullur sjálfstrausts inn í leikinn.
„Við eigum alltaf raunhæfa möguleika gegn hvaða liði sem er, en auðvitað eru þeir sigurstranglegri. Hvort við eigum 10, 30 eða 40 prósent möguleika, við getum rætt það lengi, en möguleikinn er til staðar. Þeir eru góðir á heimavelli og þetta er erfitt, en við munum klífa eldfjallið og vonandi taka stigin þrjú," segir Lars við Fótbolta.net.
Lars viðurkennir að það sé alltaf erfiðara að spila á útivelli, en Ísland vann fyrri leik liðanna 2-0 í Laugardalnum.
„Þetta er andlegt og stuðningsmennirnir eru hluti af þessu. En ég held að leikmönnum líði bara betur að spila á þeim velli sem þeir eru vanir að spila á. Þetta fer samt í taugarnar á mér, það ætti ekki að vera erfiðara að spila úti að mínu mati. Við reynum þess vegna að vinna svona mikið með hugarfar, hugarfarið í Amsterdam ætti að vera að spila okkar leik og gera það sama og við gerðum úti."
Hann býst ekki við því að Hollendingar vanmeti Ísland í þessum leik.
„Ef þeir gera það, þá held ég að þeir séu brjálaðir, og ég held að nýji þjálfarinn Blind sé ekki brjálaður. Kannski eru hollensku leikmennirnir of fullir sjálfstrausts vitandi að Ísland sé að koma í heimsókn, en ég held að þeir beri allavega einhverja virðingu fyrir okkur."
Athugasemdir
