Arnar Gunnlaugsson, landsliðsþjálfari.
„Það eru vonbrigði að missa aftur niður forskot. Þetta var verra en á móti Kanada. Leikstjórnin okkar síðasta korterið var slök og þeir gengu á lagið. Það er þreytandi að þurfa alltaf að tala um að læra af hlutum, þú lærir alltaf af mistökunum, en þetta var rosalega 'soft' mark sem við fengum á okkur," sagði Arnar Gunnlaugsson, landsliðsþjálfari, eftir 1-1 jafntefli gegn Haítí í vináttulandsleik í kvöld.
Lestu um leikinn: Haítí 1 - 1 Ísland
Það hefði margt mátt fara betur í þessum leik.
„Við hefðum mátt nýta kantana okkar miklu betur, það var gapandi svæði í fyrri hálfleik sem við nýttum í markinu okkar í seinni hálfleik. Það hefðu mátt vera fleiri færi, við fengum voðalega fá færi. Stundum fannst mér spilið of hægt. Fyrsta orðið er bara vonbrigði," sagði Arnar.
„Þessi landsliðsfótboli er bara mistakafótbolti. Við höfum fengið á okkur 13 mörk í síðustu átta leikjum og ef við greinum þau þá er þetta rosalega mikill klaufagangur. Því miður."
„Ef við náum ekki að útrýma því, þá komumst við hvorki lönd né leið," sagði Arnar.
Allt viðtalið má sjá í spilaranum hér að ofan.
