Fótbolti.net ræddi við Sverri Inga Ingason eftir 2-2 jafntefli Íslands gegn Kanada í æfingaleik í dag.
Lestu um leikinn: Kanada 2 - 2 Ísland
„Þetta var áhugaverður leikur við áhugaverðar aðstæður. Fúl útkoma, mér fannst við gera nóg til að vinna leikinn. Það sem varð okkur aðeins að falli var að við vorum ekki að vinna návígi og seinni bolta," sagði Sverrir Ingi.
„Þeir fá tvær vítaspyrnur. Ég nenni ekki að vera gera athugasemdir við dómgæsluna. Þetta var sérstakt í dag, þeir komust allavega upp með meira en við. Hann flautar bæði vítin á innan við sekúndu eftir að mennirnir féllu. Í aðdraganda fyrsta marksins keyrir vinstri bakvörðurinn Jón Dag niður. Þetta var lið sem var með læti og þeir komust upp með það."
„Við þurfum að læra sem lið að loka þessum leikjum. Þegar við förum í leiki sem skipta meira máli þurfum við að geta lokað svona leikjum. Þegar þú ert kominn í 2-0 á útivelli þurfum við að gera það sem leikurinn krefst (af okkur) á þeim tíma. Í dag var kannski ekki boðið upp á að halda í boltann en þá þurfum við að vinna seinni bolta og návígi. Við vorum undir í þeim bardaga en við þurfum að læra af því og gera betur."
Athugasemdir
