Manchester City getur tryggt sér Englandsmeistaratitilinn um helgina þegar 34. umferð enska deildartímabilsins verður spiluð. City þarf sigur og að treysta á tap hjá nágrönnunum í Manchester United.

Hún hefst á viðureign Southampton og Leicester í kvöld og heldur áfram á morgun með æsispennandi leikjum. Man City heimsækir Crystal Palace áður en Brighton tekur á móti Leeds United.

Fulham er sjö stigum frá öruggu sæti þegar fimm umferðir eru eftir og þarf helst sigur á útivelli gegn Chelsea þegar liðin mætast á morgun, áður en Gylfi Þór Sigurðsson og félagar í Everton taka á móti Aston Villa. Everton er í harðri baráttu um Evrópusæti.

Arsenal heimsækir Newcastle á sunnudaginn áður en Man Utd tekur á móti Liverpool í stórleik helgarinnar. Þrettán stig skilja liðin að í úrvalsdeildinni þar sem Rauðu djöflarnir eru búnir að tryggja sér Meistaradeildarsæti. Liverpool er óvænt fjórum stigum frá topp fjórum.

Það eru svo tveir leikir á dagskrá á mánudaginn. West Brom þarf sigur gegn Wolves til að eiga von í fallbaráttunni á meðan Jóhann Berg Guðmundsson og félagar í Burnley fá West Ham í heimsókn. Hamrarnir eru búnir að tapa tveimur leikjum í röð en þeir eru óvænt í Meistaradeildarbaráttu undir lok tímabils.

Hægt er að fylgjast með enska boltanum í Sjónvarpi Símans.

Föstudagur:
19:00 Southampton - Leicester

Laugardagur:
11:30 Crystal Palace - Man City
14:00 Brighton - Leeds
16:30 Chelsea - Fulham
19:00 Everton - Aston Villa

Sunnudagur:
13:00 Newcastle - Arsenal
15:30 Man Utd - Liverpool
18:15 Tottenham - Sheffield Utd

Mánudagur:
17:00 West Brom - Wolves
19:15 Burnley - West Ham

Tweet

Senda a Facebook Hafdu samband Senda frétt Prenta frétt Frétta leit