Landsliðskonan Karólína Lea Vilhjámlsdóttir segir komandi heimaleiki gegn Úkraínu og Englandi mjög mikilvæga og komi á hárréttum tíma, þar sem mikið er undir í baráttunni um þriðja sæti riðilsins.
„Bara gríðarlega mikilvægt, kemur á góðum tíma myndi ég segja, þar sem síðustu leikir fóru eins og þeir fóru. Gaman líka að spila við Úkraínu sem er kannski aðeins slakara lið en Spánn og England. Við erum fyrir fram betri aðilinn en við þurfum að sýna það á þriðjudaginn,“ sagði Karólína þegar Fótbolti.net ræddi við hana.
Hún segir kröfurnar innan liðsins skýrar.
„Við þurfum einfaldlega að vinna þessa leiki til að ná þriðja sætinu og komast í umspil fyrir HM. Við setjum þær kröfur á okkur sjálfar.“
Að hennar sögn þarf liðið að vera vel undirbúið fyrir krefjandi mótherja.
„Þær eru hrikalega beinskeyttar og fara beint fyrir aftan vörnina okkar. Við þurfum að passa það og svo snýst þetta líka um meira en bara fótbolta hjá þeim. Það er mikið þjóðarstolt út af öllu sem er í gangi, þannig að við þurfum að matcha þær þar.“
Karólína segir liðið þurfa að bæta sóknarleikinn eftir markalausan síðasta glugga.
„Við þurfum bara að setja boltann yfir línuna. Vera beinskeyttari, þora meira, þetta snýst fyrst og fremst um hugrekki. Við höfum gæðin til að skapa okkur færi og skora mörk, það gekk ekki síðast en vonandi gengur það núna.“
Að lokum leggur hún áherslu á mikilvægi stuðningsins úr stúkunni.
„Við viljum fá sem flesta á völlinn. Ég held að það verði geggjað veður og það er engin ástæða fyrir því að mæta ekki. Við þurfum á ykkur að halda sem þjóð.“
Sjáðu viðtalið í heild í spilaranum hér fyrir ofan.
