Rúnar Már Sigurjónsson lék fyrstu 77 mínúturnar og skoraði fyrsta mark leiksins er FC Astana lagði Kaspij Aktau að velli í þriðju umferð deildartímabilsins í Kasakstan.

Rúnar Már skoraði úr vítaspyrnu á sextándu mínútu og bættu liðsfélagar hans Tigran Barseghyan og Yuri Logvinenko mörkum við fyrir leikhlé.

Heimamenn minnkuðu muninn í síðari hálfleik og skoruðu aftur í uppbótartíma. Nær komust þeir þó ekki og lokatölur 2-3 fyrir Astana.

Rúnar Már og félagar eru með sjö stig eftir fyrstu þrjár umferðirnar. Astana hefur unnið deildina síðustu fjögur ár í röð.