England: Fyrsta markalausa jafnteflið kom á Hawthorns

Nýliðar West Bromwich Albion tóku á móti Burnley í ensku úrvalsdeildinni í dag og úr varð mikill baráttuleikur.

Bæði lið mættu í leikinn til að sigra en staðan var markalaus eftir mikið miðjumoð í fyrri hálfleik.

Það lifnaði við hlutunum því meira sem tók að líða á leikinn en hvorugu liði tókst að koma knettinum í netið þrátt fyrir góð færi. Heimamenn í West Brom fengu betri færi en gestirnir frá Burnley skutu tvisvar sinnum í tréverkið.

Jóhann Berg Guðmundsson er búinn að ná sér af meiðslum og spilaði fyrstu 69 mínúturnar á hægri kanti Burnley.

Þetta var fyrsta markalausa jafntefli tímabilsins og jafnframt fyrsta stig Burnley. West Brom er með tvö stig.