Sheffield Wednesday er fallið niður í C-deildina eftir að hafa tapað fyrir erkifjendum sínum í Sheffield United, 2-1, á Bramall Lane í Sheffield í dag.

Það var vitað fyrir leikinn að tap myndi senda Wednesday niður um deild, en átján stig voru dregin af liðinu eftir að félagið var sett í greiðslustöðvun á síðasta ári.

Eitt er að falla niður um deild en það gerir það verra þegar erkifjendur þínir fá tækifærið til að gera það og ætlaði United ekki að missa af því tækifæri.

Patrick Bamford skoraði snemma leiks eftir hræðilega hreinsun Joel Ndala. Wednesday-maðurinn kom sér í klípu og reyndi að komast undan pressu United, en hreinsun hans fór beint á Gustavo Hamer sem var fyrir utan teiginn, lagði boltann inn á Bamford sem gerði áttunda mark sitt síðan hann samdi við United.

Harrison Burrows bætti við forystuna á 19. mínútu. Bakvörðurinn hóf sóknina, boltanum komið á Sydie Peck sem átti þessa konfektsendingu aftur inn á Burrows sem skoraði með þrumufleyg í vinstra hornið.

Staðan í hálfleik 2-0 og ekkert sem benti til þess að Wednesday myndi koma til baka.

Þeir fengu smá vonarneista þegar Kalvin Phillips sá rauða spjaldið fyrir að fylgja á eftir ljótri tæklingu á Svante Ingelsson og þremur mínútum síðar minnkaði Charlie McNeill muninn með frábæru skoti úr teignum.

United náði fljótlega aftur stjórn á leiknum og hélt í forystuna. Á síðustu mínútunum sá Gabriel Otegbayo, leikmaður Wednesday, sitt annað gula spjald og þar með rautt.

Sjö mínútum var bætt við venjulegan leiktíma en Wednesday tókst ekki að bjarga andliti og er því fallið niður um deild. Ansi grimmt gegn nágrönnunum sem munu aldrei gleyma þessum sögulega leik.

Wednesday setti það óeftirsóknarverða met að verða fyrsta liðið í sögu EFL-deildarinnar til að falla í febrúar.

Meira að segja án stigafrádráttarins væri Wednesday í fallsæti, en liðið hefur ekki unnið leik síðan gegn Portsmouth í sjöttu umferð deildarinnar í september.

Þetta var fjórði sigur Sheffield United í síðustu sex leikjum en liðið er í 14. sæti með 45 stig, tólf stigum fyrir ofan fallsæti.