Sandra María Jessen var á sínum stað í fremstu víglínu hjá Köln sem tapaði gegn Union Berlin í efstu deild þýska boltans í kvöld.
Sandra lék allan leikinn í naumu 2-1 tapi sem kemur sér afar illa fyrir evrópuvonir Kölnar, sem er sex stigum frá evrópusæti.
Í efstu deild í Sviss lék Bergrós Ásgeirsdóttir allan leikinn í lífsnauðsynlegum sigri hjá Aarau í fallbaráttunni. Bergrós og stöllur heimsóttu Luzern og stóðu uppi sem sigurvegarar, en þetta er fyrsti sigur liðsins eftir 14 umferðir á deildartímabilinu.
Aarau er með 6 stig, þremur stigum á eftir Luzern sem situr í öruggu sæti.
Brynjar Ingi Bjarnason fékk þá að spila síðustu mínúturnar í sigri Greuther Fürth í næstefstu deild þýska boltans.
Greuther vann gríðarlega dýrmætan 2-1 sigur á heimavelli gegn Arminia Bielefeld og kom Brynjar Ingi inn fyrir Jan Elvedi sem meiddist.
Brynjar byrjaði síðustu fjóra leiki Greuther í röð fyrir daginn í dag en liðið er í fallsæti, með 22 stig eftir 23 umferðir. Liðið var í botnsæti deildarinnar fyrir sigurinn í dag.
Í næstefstu deild í Hollandi töpuðu liðsfélagar Helga Fróða Ingasonar í liði Helmond á heimavelli gegn toppliði Den Haag. Helgi Fróði var ónotaður varamaður í liði Helmond sem er í neðri hluta deildarinnar með 32 stig eftir 28 umferðir.
Hlynur Freyr Karlsson var þá ekki í hóp þegar Brommapojkarna lagði IFK Skovde að velli í sænska bikarnum.
Í æfingaleikjum dagsins var Hilmir Rafn Mikaelsson í byrjunarliði Noregsmeistara Viking sem gerðu jafntefli Tromsö á meðan Ægir Jarl Jónasson var í byrjunarliði AB í jafntefli gegn Fremad Amager. Nóel Atli Arnórsson var að lokum í byrjunarliði AaB sem steinlá gegn Sandefjord.
Union Berlin 2 - 1 Köln
Luzern 2 - 3 Aarau
Greuther Fürth 2 - 1 Arminia Bielefeld
IFK Skovde 0 - 3 Brommapojkarna
Helmond 1 - 3 Den Haag
Tromsö 1 - 1 Viking
Sandefjord 4 - 0 AaB
Fremad Amager 1 - 1 AB
Hobro 0 - 0 Aarhus Fremad
Hilleröd 2 - 2 Lyngby
Brann 2 - 2 Sotra
Athugasemdir
