Fótbolti.net

sun 22. febrúar 2026 08:30

Ívan Guðjón Baldursson

Pep gefur leikmönnum þriggja daga frí

Hvetur þá til að drekka kokteila

Mynd: EPA

Pep Guardiola var ánægður eftir dýrmætan sigur gegn Newcastle United í ensku úrvalsdeildinni í gærkvöldi.

Lærlingar hans í Manchester City spiluðu góðan leik til að standa uppi sem sigurvegarar og minnka bilið í titilbaráttunni niður í tvö stig. Þetta var þriðji sigur Man City í þremur leikjum gegn Newcastle á nýju ári eftir að hafa unnið bæði heima og úti í undanúrslitum deildabikarsins. Newcastle hafði þó betur í viðureign liðanna í ensku úrvalsdeildinni á St. James' Park í nóvember.

Liðin mætast svo aftur í 16-liða úrslitum enska bikarsins og mun sá leikur fara fram á St. James' Park. Þá fær Newcastle tækifæri til að hefna fyrir síðustu þrjár innbyrðisviðureignir.

„Newastle er rosalega sterkt lið og ég er virkilega ánægður með sigurinn, það verður algjör martröð að spila aftur við þá í bikarnum eftir nokkrar vikur. Við verðum að vera ennþá betri heldur en þetta ef við viljum vinna úrvalsdeildartitilinn. Við erum með mikið af nýjum leikmönnum í hópnum sem hafa ekki reynslu af því að vinna deildina og ekki get ég spilað leikina. Við verðum að bæta okkur ef við viljum berjast um úrvalsdeildartitilinn," sagði Guardiola.

„Ég sagði við strákana að njóta næstu þriggja daga, ég sagði þeim að drekka mikið af kokteilum og njóta lífsins. Eftir það er alvöru æfing og svo leikur gegn Leeds og ég veit hversu erfiður leikur það verður. Ef það kemur eitthvað bakslag þá höldum við áfram á okkar braut, við gefumst aldrei upp. 10 eða 11 leikir eru mjög mikið í úrvalsdeildinni, það getur allt gerst."

Pep hrósaði O'Reilly og Erling Haaland sérstaklega fyrir þeirra þátt í sigrinum.

„Strákarnir voru frábærir, Erling var svo mikilvægur. Við hefðum ekki getað gert þetta án hans. Þetta eru mikilvæg stig og strákarnir eiga skilið að fá þrjá daga í frí áður en þeir mæta til leiks í næsta bardaga gegn Leeds.

„Nico var mjög mikilvægur fyrir okkur í dag. Hann er loksins byrjaður að spila í sinni eigin stöðu og hann gefur okkur mikinn líkamlegan styrk á miðjunni. Hann hefur alla tíð spilað þessa stöðu og er með ótrúlega aðlögunarhæfileika sérstaklega miðað við aldur. Ég er mjög stoltur að leikmenn eins og Nico, Phil (Foden) og Rico (Lewis) hafi komið úr akademíu félagsins."

O'Reilly er 20 ára gamall og hefur tekið þátt í 60 keppnisleikjum fyrir City og tveimur A-landsleikjum fyrir England eftir að hafa spilað upp yngri landsliðin.

		L	U	J	T	ms:	mf:	mun	Stig
1	Arsenal	30	20	7	3	59	22	+37	67
2	Man City	29	18	6	5	59	27	+32	60
3	Man Utd	29	14	9	6	51	40	+11	51
4	Aston Villa	29	15	6	8	39	34	+5	51
5	Chelsea	29	13	9	7	53	34	+19	48
6	Liverpool	29	14	6	9	48	39	+9	48
7	Brentford	29	13	5	11	44	40	+4	44
8	Everton	29	12	7	10	34	33	+1	43
9	Bournemouth	29	9	13	7	44	46	-2	40
10	Fulham	29	12	4	13	40	43	-3	40
11	Sunderland	29	10	10	9	30	34	-4	40
12	Newcastle	29	11	6	12	42	43	-1	39
13	Crystal Palace	29	10	8	11	33	35	-2	38
14	Brighton	29	9	10	10	38	36	+2	37
15	Leeds	29	7	10	12	37	48	-11	31
16	Tottenham	29	7	8	14	39	46	-7	29
17	Nott. Forest	29	7	7	15	28	43	-15	28
18	West Ham	29	7	7	15	35	54	-19	28
19	Burnley	29	4	7	18	32	58	-26	19
20	Wolves	30	3	7	20	22	52	-30	16