Það er óhætt að segja að það sé ekki mikill áhugi fyrir æfingaleik Íslands og Venesúela sem fram fer í Austurríki í dag.
Lestu um leikinn: Venesúela 0 - 1 Ísland
Leikurinn fer fram á heimavelli Admira Wacker Mödling í úthverfi Vínarborgar, höfuðborgar Austurríkis.
Það er ekki mikill áhugi á þessum leik í Austurríki og eru um 20 manns í stúkunni. Hörður Magnússon kom inn á það að leikurinn hefði verið lítið sem ekkert auglýstur ytra og fólk viti kannski ekki að hann fari þarna fram. Hann er opinn almenningi en fer eiginlega fram í kyrrþey.
Það hefði líklega verið meiri áhugi á þessum leik fyrir sex árum þegar íslenska liðið var upp á sitt besta, en liðið hefur ekki verið að ná í góð úrslit upp á síðkastið.
„Það er ansi notalegt hérna á vellinum. Ég er jú eini fjölmiðlamaðurinn sem hér er staddur svo menn eru lítið að stressa sig á hlutunum. Milt og gott veður. Hálfskýjað og 15 gráður. Völlurinn mjög góður að sjá," skrifaði Örvar Arnarsson í beinni textalýsingu frá leiknum og bætti við:
„Þessi leikur verður algjörlega áhorfendalaus... minnir fullmikið á Covid tímann drepleiðinlega."
Athugasemdir