Lestu um leikinn: Valur 1 -  0 Grindavík

„Þetta var nú ekki merkilegur leikur en stigin féllu okkur megin og ég er ánægður með það. Það var ekki mikið að gerast í þessum leik en við tróðum inn marki og það telur."

„Grindavík er með fínt lið og við vissum það fyrir leikinn. Það er allt erfitt hjá okkur núna."

Annar sigurleikur Vals á heimavelli í röð og Valsmenn komnir með tíu stig að loknum tíu leikjum.

„Þetta hefur verið okkar vígi en við höfum aðeins hikstað í sumar en vonandi gerist það ekki aftur," sagði Ólafur.

Birnir Snær Ingason var ekki í leikmannahópi Vals í dag. Sögusagnir hafa verið uppi um það að hann gæti mögulega verið lánaður í félagaskiptaglugganum sem opnar 1. júlí. Ólafur Jóhannesson þvertók fyrir það að Birnir færi í glugganum.

„Nei," var svarið hjá Óla sem var spurður að því síðan í þrígang hvort Birnir Snær yrði hjá Val allt tímabilið.

„Hann fer ekki í glugganum eins og þú varst að spyrja mig að," þrjóskaðist Ólafur loks að svara og þannig lauk viðtalinu. Eftir viðtalið lét Ólafur síðan undirritaðan heyra það og hneykslaðist yfir því að vera spurður að sömu spurningunni tvisvar sinnum í röð.