Dóri Árna á hiðarlínunni í kvöld.
Vítið dæmt.
Eyþór Wöhler og Arnór Gauti í baráttunni.
„Frábær tilfinning og virkilega vel spilaður leikur af okkar hálfu fannst mér. Leikmenn mættu grimmir, agaðir og einbeittir inn í leikinn og fyrri hálfleikur var virkilega góður. Mér fannst við fá 3-4 góð færi í fyrri hálfleik og kannski pínu svekktur að ná ekki forystunni. Mér leið eins og við værum mögulega að fara harka þetta út 1-0 en svo var alvöru dramatík í lokin. Menn gerðu vel í að halda fengnum hlut og við förum heim með þrjú stig," sagði Halldór Árnason, þjálfari Breiðabliks, eftir sigur gegn KR á Meistaravöllum í kvöld.
Lestu um leikinn: KR 2 - 3 Breiðablik
„Mér fannst við gera rosalega vel þangað til alveg í blálokin í að halda þeim frá markinu okkar. Það er ekki fyrr en Stefán Árni skorar þetta mark (sem þeir ná að komast að markinu okkar). Við komumst í 3-1 og þá hélt ég að við værum búnir að klára þetta. Svo er algjör kamikaze fótbolti hérna í lokin, ég veit það ekki... mér fannst Wöhlerinn dýfa sér, fannst hann fara þægilega niður og miðað við línuna í leiknum fannst mér þetta djöfulli ódýrt víti. Við gerðum vel að halda fengnum hlut," sagði Dóri.
Hann ræddi um dómgæsluna í kjölfarið og má heyra og sjá hann ræða um línuna í leikjum í spilaranum efst.
Damir Muminovic (Breiðablik) var ekki sáttur við Eyþór Wöhler (KR) í lokin þegar hann fór í Arnór Gauta Jónsson (Breiðablik). „Ég missti af því, eru þeir ekki æskufélagar úr Mosfellsbænum? Þeir hljóta að leysa það sín á milli."
„Ég sé þetta svo illa, ég átti mig ekki á þessu (þegar Axel Óskar Andrésson (KR) lét Patrik Johannesen (Breiðablik) heyra það í lokin). Það var auðvitað rosalegur hiti í leiknum, mörk fram og til baka sem var mjög óvænt fannst mér miðað við hvernig leikurinn spilaðist. Við ætlum að reyna klára leikinn og þeir eru að reyna sækja stigið. Það verður bara hamagangur og upp að ákveðnu marki er það bara hluti af leiknum, tilfinningar og menn skilja svo bara sáttir. Það er bara hluti af fótbolti."
Uppalinn KR-ingur
„Það er alltaf góð tilfinning að vinna. Það eru að verða komin tíu ár núna síðan ég var síðast í KR. Í dag er ég bara þjálfari Breiðabliks og þetta er bara eins og hver annar leikur þannig lagað. Auðvitað sögufrægur völlur, alltaf gaman að koma og spila hér og frábært að fara héðan með þrjú stig."
Jason þefar þessa bolta uppi
Jason Daði Svanþórsson skoraði þriðja mark Breiðabliks eftir mistök hjá Guy Smit í marki KR.
„Virkilega vel gert hjá Jasoni. Uppleggið var, þegar við myndum ná boltanum niður, að fara og finna Jason og Aron (Bjarnason). Jason þefar þessa bolta uppi og klárar þetta svakalega yfirvegað. Virkilega vel gert hjá honum."
Virkilega vel svarað
Breiðablik hafði fyrir þennan leik tapað tveimur leikjum í röð. Liðið tapaði gegn Víkingi í bikarnum og svo gegn Keflavík í bikarnum.
„Mjög ánægður. Víkingsleikurinn var að mínu mati 50-50 leikur og öll tölfræði og annað bakkar það upp, við vorum yfir í flestum návígum í þeim leik. Mér fannst hugur í mönnum en við bara klikkuðum á ögurstundum og sýndum slakan varnarleik í 1 á 1 stöðum sem má ekki gera gegn Víkingi."
„Keflavíkurleikurinn var mjög slakur, andlaus. Ég veit ekki hvort að menn hafi verið í einhverjum öðrum leik en þeim leik og auðvitað svekkjandi að detta út úr bikarkeppninni. Menn svöruðu virkilega vel í dag og mikill andi í liðinu," sagði Dóri.
Í viðtalinu ræðir hann um völl KR-inga, gagnrýnina á RÚV eftir bikarleikinn og stöðuna á meiddu leikmönnunum.
Athugasemdir
