Hver fær það verkefni að koma Íslandi á HM 2026?
Normaðurinn Age Hareide er hættur sem landsliðsþjálfari Íslands. Var það hans eigin ákvörðun að hætta.
Ísland fer því inn með nýjan þjálfara inn í undankeppni HM á næsta ári. Leit að nýjum þjálfara er hafin hjá sambandinu.
Ísland fer því inn með nýjan þjálfara inn í undankeppni HM á næsta ári. Leit að nýjum þjálfara er hafin hjá sambandinu.
„Ég vil byrja á því að þakka Age fyrir hans góðu störf og óska honum velfarnaðar í framtíðinni. Á tíma hans með liðið hafa margir leikmenn tekið stór skref, leikmenn sem eiga framtíðina fyrir sér með landsliðinu. Við munum vanda til verks næstu vikur og mánuði við leit að nýjum þjálfara," segir Þorvaldur Örlygsson, formaður KSÍ.
En hver tekur við liðinu og fær það stóra verkefni að koma því inn á HM 2026?
Fótbolti.net hefur tekið saman tíu kosti sem má skoða hér fyrir neðan.
Arnar Gunnlaugsson - Er líklegastur í starfið ásamt Frey Alexanderssyni. Hefur unnið allt sem hægt er að vinna í íslenska boltanum og er gríðarlega fær þjálfari. Einnig fyrrum landsliðsmaður.
David Moyes - Hefur tengingu til Íslands frá því fyrir mörgum árum þegar hann kom til ÍBV sem ungur drengur. Gæti hann snúið aftur? Er án starfs en hann er orðaður við Leicester.
Davíð Snorri Jónasson Hefur starfað lengi hjá KSí og undanfarin misseri sem aðstoðarþjálfari landsliðsins. Væri öflugt að halda honum í því starfi en kannski kemur til greina að hann fái stöðuhækkun.
Graham Potter - Var hér á landi á dögunum og hélt fyrirlestur hjá KSÍ. Eru örugglega enn með símanúmerið hans. Var síðast með Chelsea þar sem hlutirnir gengu ekki upp en hann er gríðarlega öflugur þjálfari. Hann sýndi það líklega mest hjá Östersund í Svíþjóð þar sem hann gerði rosalega mikið með lítið.
Heimir Hallgrímsson - Það er draumur margra Íslendinga að fá Heimi aftur. Hann er þessa stundina í starfi sem landsliðsþjálfari Írlands þar sem pressan á honum er gríðarleg. Ekki mjög raunhæfur kostur í augnablikinu en draumakostur margra. Þjálfaði íslenska landsliðið með Lars Lagerback frá 2011 til 2016 og var svo aðalþjálfari frá 2016 til 2018. Gerði ótrúlega hluti eins og allir vita.
Freyr Alexandersson - Hefur unnið kraftaverk með Lyngby í Danmörku og Kortrijk í Belgíu. Starfaði áður lengi hjá KSÍ og er með mikla reynslu úr landsliðsumhverfinu. Væri frábær kostur í þetta starf.
Janne Andersson - Við höfum áður farið þá leið að ráða fyrrum landsliðsþjálfara Svíþjóðar. Andersson gerði fína hluti lengst af með Svía en það endaði frekar illa. Er samt sem áður öflugur þjálfari sem gæti fundið sig vel hér á landi.
Kasper Hjulmand - Hætti nýverið störfum sem landsliðsþjálfari Danmerkur. Með miklar hugmyndir um fótbolta og er góður í að útfæra þær.
Ole Gunnar Solskjær - Er enn án félags eftir að hafa yfirgefið Manchester United. Er að bíða eftir einhverju spennandi. Gæti það verið landsliðsþjálfarastarf Íslands?
Rúnar Kristinsson - Vann allt sem hægt var að vinna sem þjálfari KR og gerði gott mót framan af með Fram síðasta sumar. Hefur einnig þjálfað erlendis. Er goðsögn í íslenskum fótbolta og spilaði á sínum tíma 104 landsleiki.
Athugasemdir
