„Ég er ótrúlega svekktur með að jafna ekki leikinn, við áttum ekki endilega skilið að vinna en úr því sem komið var þá áttum við algjörlega skilið að skora úr vítinu sem við fáum og það er óhætt að segja að það séu svakaleg vonbrigði,” sagði Halldór Jón Sigurðsson þjálfari Þórs eftir 2-3 tap gegn Grindavík nú í kvöld.
Lestu um leikinn: Þór 2 - 3 Grindavík
„Þeir lögðu grunninn að þessu í fyrri hálfleik. Við vorum ekki nógu agressívir og nógu öflugir í fyrri hálfleik í varnarvinnunni og í rauninni sóknarvinnunni líka. En við komum sterkir til baka og þeir sýndu mikinn karakter að ná þessari stöðu að geta jafnað leikinn á lokamínútunum, sem er erfitt að komast í því það er auðveldara að gefast upp og grenja,” sagði Donni einnig.
Aðspurður hvort Jóhann Helgi Hannesson, sem klúðraði vítinu, sé aðal vítaskytta liðsins sagði Donni: ,,Jóhann hefur verið aðal vítaskytta liðsins já, engin spurning.”
Balázs Tóth meiddist og þurfti að fara af velli í leiknum. Aðspurður um meiðsli hans sagði Donni: „Hann tognaði framan í læri þannig að ég geri ráð fyrir því að hann verði eitthvað frá. Enn ein meiðslin í varnarlínunni, þetta hjálpar ekki nokkrum manni, nema kannski hinum liðunum. Við höfum átt í gríðarlegum erfiðleikum með varnarlínuna að reyna að stabílasera það að einhverju leyti og það virðist vera áframhald á því.”
Nánar er rætt við Donna hér að ofan.
