Tveir íslenskir fjölmiðlar eru mættir til Liepaja til að fjalla um komandi leik hjá stelpunum okkar, við Hafliði Breiðfjörð frá Fótbolta.net og þau Kristjana Arnarsdóttir og Óskar Nikulásson frá RÚV.

Eftir ökuferð frá höfuðborginni Ríga í morgun fór ég ásamt Hafliða í skoðunarferð um svæðið. Eitt af því skemmtilegasta við okkar starf er að heimsækja nýja staði sem maður hefði líklega annars aldrei komið til og ef tími gefst aflögu er nærandi að taka smá túrista á þetta.

Liepaja liggur við Eystrarsaltið og er mikilvæg hafnarborg. En þegar maður fræðist um borgina er það sem hvað helst vekur athygli skelfilegir atburðir sem áttu þar sér stað í seinni heimsstyrjöldinni.

Í innrás nasista undir stjórn Adolfs Hitlers fóru fram skipulögð fjöldamorð á gyðingum í borginni og í nágrenni hennar. Um 5.000 af 5.700 gyðingar í Lipeaja voru skotnir til bana á árunum 1941-42. Flestir voru myrtir á strönd á gömlu hersvæði sem staðsett var rétt fyrir utan borgina.

Það svæði heimsóttum við í dag en þar er nú kominn upp minningarreitur. Það var furðuleg og magnþrungin tilfinning að heimsækja þennan stað, horfa yfir Eystrarsaltið og fræðast nánar um þau skelfilegu voðaverk sem þarna áttu sér stað.

Rétt við sömu strandlengju stendur svo Daugava leivkangurinn í Liepaja, völlurinn þar sem Ísland mun vonandi skila þremur stigum í hús á þriðjudaginn.