Landsliðskonan Hafrún Rakel Halldórsdóttir skrifaði nýverið undir nýjan samning við Brøndby í Danmörku og segir skrefið hafa verið það rétta á sínum ferli.
„Þetta er bara geggjað. Ég er mjög ánægð og finnst ég vera að bæta mig á hverjum degi þar. Þannig þetta var rétt ákvörðun fyrir mig núna að skrifa undir,“ sagði Hafrún.
Hún segir dönsku deildina vera jafnari en hún átti von á og krefjandi fyrir leikmenn.
„Mér finnst margir leikir mjög jafnir, það eru mörg góð lið. Við erum að mæta í hvern einasta leik sem úrslitaleik.“
Daglegt líf atvinnumannsins er þó rólegra en margir halda.
„Bara mjög rólegur í raun og veru. Bara vakna, fara á æfingu og svo er ég í námi, þannig bara blanda af því að læra, æfa og borða.“
Hafrún segir sjálfstraust og hugrekki lykilatriði fyrir unga leikmenn á Íslandi sem stefna á atvinnumennsku.
„Bara þora í raun og veru. Sjálfstraust, halda áfram, gefast ekki upp og ekki vera of harðar við sjálfa ykkur.“
