Igli Tare, yfirmaður fótboltamála hjá AC Milan, býst við því að króatíski miðjumaðurinn Luka Modric skrifi undir framlengingu á samningi sínum við félagið.
Modric hefur átt frábært tímabil í ítölsku deildinni þar sem hann var fljótur að festa sig í sessi í byrjunarliði Milan eftir að hafa komið á frjálsri sölu síðasta sumar.
Modric er 40 ára gamall og hefur komið með beinum hætti að 5 mörkum í 33 deildarleikjum á tímabilinu. Hann hefur hjálpað Milan að endurheimta meistaradeildarsæti eftir að liðið endaði óvænt í 8. sæti í fyrra.
Milan situr í þriðja sæti í Serie A þegar fjórar umferðir eru eftir af tímabilinu og er svo gott sem öruggt með þátttöku í deildarkeppni Meistaradeildarinnar næsta haust.
„Ég býst við því að Luka Modric skrifi undir nýjan samning og verði með okkur í annað ár," segir Tare.
