Jóhannes Karl Guðjónsson þjálfari FH svaraði spurningum eftir 1-1 jafntefli á útivelli gegn ÍBV í fyrstu umferð á nýju tímabili í Bestu deild karla.
Lestu um leikinn: ÍBV 1 - 1 FH
Jói Kalli var óhress með frammistöðu sinna manna í fyrri hálfleik en ánægður með seinni hálfleikinn. Hann er þó svekktur að hafa ekki náð sigurmarki undir lok leiksins.
„Við vorum ekki við sjálfir í fyrri hálfleik, við vorum alls ekki sáttir með okkar leik hvorki með né án boltans. ÍBV var eiginlega við stjórnvölinn allan fyrri hálfleikinn," sagði Jói, sem var þó ánægður með frammistöðuna eftir leikhlé. „Við ræddum þetta í leikhlénu og það var allt annað uppi á teningnum í seinni hálfleik. Ég get ekki gert annað en að hrósa mínum mönnum sem komu út í seinni hálfleikinn og leikmönnunum sem komu inná því að þegar uppi er staðið hefðum við getað unnið þennan leik.
„Við klúðrum víti og skorum jöfnunarmark eftir það sem sýnir mikinn karakter og fáum svo tvö önnur góð færi til að vinna leikinn undir lokin."
Markavélin fyrrverandi Tryggvi Guðmundsson tók viðtal við Jóhannes Karl að leikslokum og nefndi að FH vantaði alvöru 'striker' í sínar raðir til að klára færin sem fóru forgörðum í dag.
„Það hefur alveg verið eitthvað talað um það að okkur vanti meiri kraft þarna fram á við. Flóki er hörkuleikmaður og Sverrir Páll kemur inná í lokin líka og það er alveg erfitt að eiga við þá. Við viljum hafa fjölbreytta möguleika þarna fram á við og við erum alveg með það í hópnum nú þegar."
