Það fóru þrír leikir fram í umspili um sæti í riðlakeppni Meistaradeildarinnar í kvöld og komu þrír Íslendingar við sögu.
Alfons Sampsted var á sínum stað í varnarlínu Bodö/Glimt sem lagði Dinamo Zagreb að velli 1-0 þökk sé marki Amahl Pellegrino. Seinni leikurinn í Króatíu verður mikil skemmtun.
Sama má segja um viðureign Kaupmannahafnar gegn tyrkneska félaginu Trabzonspor. Þar lék Hákon Arnar Haraldsson fyrstu 68 mínúturnar og var skipt af velli í stöðunni 2-0 fyrir Kaupmannahöfn.
Gestirnir frá Tyrklandi voru betra liðið í seinni hálfleik og minnkuðu muninn á 79. mínútu, skömmu áður en Ísak Bergmann Jóhannesson var skipt inn. Mark Trabzonspor kom því þegar enginn Íslendingur var á vellinum og urðu lokatölur 2-1.
Rangers tók þá á móti PSV Eindhoven í fjörugum leik sem lauk með 2-2 jafntefli. Markvörður PSV gerði skelfileg mistök í öðru marki Rangers í leiknum og lagði hinn eftirsótti Cody Gakpo jöfnunarmark PSV upp á 78. mínútu.
Sigurvegarar viðureignanna fara í riðlakeppni Meistaradeildarinnar. Tapliðin fara í riðlakeppni Evrópudeildarinnar.
Bodö/Glimt 1 - 0 Dinamo Zagreb
1-0 Amahl Pellegrino ('37 )
FC Kobenhavn 2 - 1 Trabzonspor
1-0 Viktor Claesson ('9 )
2-0 Lukas Lerager ('48 )
2-1 Anastasios Bakasetas ('79 )
Rangers 2 - 2 PSV
0-1 Ibrahim Sangare ('37 )
1-1 Antonio-Mirko Colak ('40 )
2-1 Tom Lawrence ('70 )
2-2 Armando Obispo ('78 )
