Heimild: Vísir 

„Ég fékk leikmann aftan á hælinn þegar ég var að hlaupa, með tábergið niðri í grasinu, svo ristin á mér kramdist,“ segir Dagný í samtali við Vísi í dag.

Þrátt fyrir meiðslin skoraði Dagný þrennu gegn Lettum og spilaði vel í jafntefli gegn Svíum í síðasta mánuði. Hún lék einnig með Selfossi í sigri á KR 30. september áður en hún tók sér hlé frá fótbolta.

„Ég er með töluverðan beinbjúg í nokkrum beinum; í tveimur ökklabeinum og í hluta af aðlægum ristarbeinum. Ég viðurkenni að það er orðið svolítið þreytandi að geta ekki leikið við son minn á daginn því mér er svo illt í fætinum. Daglegt amstur er búið að vera bras,“ segir Dagný sem hefur verið með hækjur síðustu vikuna og reynt að hlífa fætinum.

Dagný segir óvíst hvort hún nái stórleiknum gegn Svíum en íslenska landsliðið á einnig eftir leiki gegn Slóvakíu og Ungverjalandi síðar á árinu.

„Það er kannski ekki sniðugt að vera búin að hvíla sig í tvær vikur og klúðra bataferlinu með því að spila gegn Svíum. Þó að það sé stórleikur þá er hann það ekki nema að við vinnum líka hina tvo leikina í lok nóvember og þá vil ég spila," sagði Dagný við Vísi.