„Fyrsta tapið okkar á heimavelli og að fá á okkur þrjú mörk var súrt. Sérstaklega því staðan var 1-1 í hálfleik," sagði Ágúst Gylfason þjálfari Fjölnis eftir 1-3 tap heima gegn FH í kvöld.
Lestu um leikinn: Fjölnir 1 - 3 FH
„Við komum frábærir inn fyrstu 20 mínúturnar í seinni hálfleik og gerðum hraða atlögu að FH og áttum að skora eitt mark. Við vorum frekar fúlir með það og gæði eins og FH hefur, þá refsa þeir. Tvö fyrstu mörkin á fjærstöngina þegar menn misstu aðeins einbeitinguna. Þeir refsa bara."
Fjölnisliðið hefur veikst því FH kallaði Emil Pálsson til baka úr láni og áður hafði liðið misst miðvörðinn Daniel Ivanovski. Ágúst ætlar að styrkja liðið frekar.
„Það koma nokkrir leikmenn í byrjun júlí á prufu hjá okkur erlendis frá. Við erum búnir að semja við einn leikmann sem á eftir að fara í læknisskoðun. Hann á eftir að skrifa undir en hann kemur úr 1. deildinni í Danmörku."
