England: Welbeck aðalmaðurinn í sigri á Leeds

Brighton og Leeds United áttust við í öðrum leik dagsins í ensku úrvalsdeildinni.

Brighton var betra liðið í dag og var með yfirhöndina í fyrri hálfleiknum. Á 14. mínútu braut Ezgjan Alioski á Danny Welbeck og vítaspyrnan réttilega dæmd.

Pascal Gross steig á punktinn og skoraði. Illan Meslier fór í rétt horn en spyrnan var góð hjá Gross. Leandro Trossard fékk dauðafæri fyrir heimamenn undir lok fyrri hálfleiks en tókst ekki að skora.

Svipað var upp á teningnum í byrjun síðari hálfleiks. Brighton varðist mjög vel og tókst að loka á allar aðgerðir gestanna. Ben White, fyrrverandi leikmaður Leeds, fékk gott færi um miðjan síðari hálfleik en honum brást bogalistinn.

Þegar Leeds virtist vera koma sér inn í leikinn og pressa á heimamenn þá kom hins vegar annað markið frá Brighton. Welbeck tók þá frábærlega á móti knettinum áður en hann kláraði færið vel í fjærhornið.

Öflugur sigur hjá Brighton sem er nú tíu stigum frá fallsæti og fór langt með að tryggja sæti sitt í deildinni í dag. Leeds United er áfram í níunda sæti deildarinnar.