Grótta kom sér upp í fimmta sæti Lengjudeildarinnar með að vinna sannfærandi, 5-1, sigur á Leikni á Vivaldi-vellinum í kvöld.

Þetta var einstefna meira og minna allan leikinn. Grótta sótti strax í byrjun leiks en Viktor Freyr Sigurðsson, markvörður Leiknis, varði í tvígang á elleftu mínútu, fyrst frá Sigurði Steinari en boltinn datt fyrir Pétur Theodór og aftur varði Viktor.

Pétur bætti upp fyrir það fjórum mínútum síðar með góðu skoti úr teignum og gerði Grímur Ingi Jakobsson annað markið með frábæru skoti fyrir utan teig og efst upp í hægra hornið.

Leiknismenn keyrðu á Gróttu næstu mínúturnar og uppskáru mark er Brynjar Hlöðvers skallaði boltanum í netið eftir hornspyrnu en Grótta svaraði er Aron Bjarki Jósepsson stangaði aukaspyrnu Gríms Inga í netið.

Grótta gerði út um leikinn í upphafi síðari hálfleiks með tveimur mörkum. Pétur Theodór gerði fjórða markið eftir hornspyrnu með skalla og síðan kom fimmta markið eftir furðulegt atvik í teignum.

Sigurður Steinar átti skot sem fór af leikmanni Leiknis og upp í loftið. Viktor var að gera sig kláran að ná til boltans en Arnar Þór truflaði hann og lak boltinn í netið.

Öruggur 5-1 sigur Gróttu sem eru í fimmta sæti með 6 stig en Leiknir með aðeins 3 stig í 10. sæti.