FH varð í gærkvöldi Íslandsmeistari í 2. flokki karla eftir öruggan sigur á Haukum í næstsíðustu umferð Íslandsmótsins. Arnar Sigþórsson setti þrennu í leiknum og er meðal þriggja markahæstu leikmanna deildarinnar sem lesendur ættu að kannast við.

Arnar, Stefán Ingi Sigurðarson og Lúkas Logi Heimisson eru allir komnir með 15 mörk. Stefán Ingi þykir gríðarlegt efni og er byrjaður að spila með meistaraflokki Blika rétt eins og Lúkas Logi sem er búinn að koma við sögu í sex Pepsi Max-deildarleikjum með Fjölni í sumar.

FH vann leikinn 4-1 í gærkvöldi og er með 43 stig eftir 17 umferðir, sjö stigum fyrir ofan Breiðablik sem á leik til góða. Blikar geta ekki náð FH því það eru aðeins tvær umferðir eftir af tímabilinu.

FH er stýrt af Sam Tillen, fyrrum leikmanni FH og Fram, og Davíð Ólafssyni.