Matip fór meiddur af velli seint í leiknum gegn Fulham og óttaðist Klopp það versta.

Hann taldi meiðslin alvarleg og hafði hann rétt fyrir sér. Matip sleit krossband og er ljóst að hann verður ekki meira með á þessu tímabili, en Klopp staðfesti meiðslin í viðtali eftir 2-0 sigurinn á Sheffield United í kvöld.

Í raun gæti hann hafa spilað sinn síðasta leik fyrir félagið því samningur hans rennur út eftir tímabilið.

Matip er 32 ára gamall miðvörður sem hefur verið á mála hjá Liverpool í sjö ár.

Á þeim tíma hefur hann spilað 201 leik og skorað 11 mörk ásamt því að vinna alla þá titla sem í boði eru.