Úlfur, sem er fæddur árið 2003, var í algjöru lykilhlutverki hjá Njarðvík en hann hefur komið inn á sem varamaður í síðari hálfleik í síðustu þremur leikjum FH-inga.

„Úlfur Ágúst er búinn að vera lykilmaður í besta liðinu í 2. deild áður en hann er kallaður til baka til þess að spila 15 mínútur á móti Val þegar vantar mark," sagði Sverrir Mar Smárason í útvarpsþættinum Fótbolta.net síðasta laugardag.

„Ég skil það ekki alveg sko, sérstaklega þegar þeir eru farnir að færa Matta Vill úr strikerastöðunni. Af hverju notarðu þá ekki þennan strák? Til hvers ertu að kalla hann til baka ef þú ætlar ekki að henda honum inn í liðið?"

„FH græðir meira á því - að mínu mati - ef hann klárar tímabilið með Njarðvík og komi svo fullur sjálfstraust til FH í vetur."

FH er að berjast í fallbaráttunni í Bestu deildinni. Næsti leikur liðsins er stórleikur gegn ÍBV, en bæði þessi lið eru að berjast fyrir lífi sínu í deildinni.

Njarðvík hefur verið að ströggla án Úlfs og er liðið búið að tapa tveimur leikjum í röð í 2. deild. Njarðvík er samt sem áður með fimm stiga forskot á toppnum.

Hægt er að hlusta á alla umræðuna úr útvarpsþættinum hér fyrir neðan.