Hlín Eiríksdóttir var full af orku í kvöld í 3-0 sigri Piteå á Djurgården í sænsku úrvalsdeildinni en hún gerði öll þrjú mörk liðsins og það eftir miðnætti.
Leikurinn hófst klukkan 23:00 og er það þekkt hefð í Svíþjóð að spila leiki í miðnætursólinni.
Þetta var mikill og stór viðburður og sýndi Hlín sínar bestu hliðar í leiknum og skoraði öll þrjú mörk liðsins.
Landsliðshópur Íslands var tilkynntur á föstudag og var Hlín ekki í hópnum. Það er erfitt að fá slíkar fréttir en Hlín nýtti orkuna vel og er staðráðin í að sanna sig, enda alveg möguleiki á að það verði eitthvað um skakkaföll fyrir Evrópumótið.
Hlín er í fjórða sæti yfir markahæstu leikmenn sænsku deildarinnar með 8 mörk og þá situr Piteå í 8. sæti með 20 stig.
Athugasemdir