Bruno Fernandes skoraði tvö fyrstu mörk leiksins en fljótlega eftir seinna markið gerði Steven Gerrard stjóri Aston Villa, skiptingu.

Hann setti nýjasta leikmann liðsins Philippe Coutinho inná fyrir Morgan Sanson. Coutinho lagði upp fyrra mark Villa og skoraði það síðara.

Sanson var ekki sáttur með að vera tekinn af velli en hann sparkaði hressilega í vatnsbrúsa sem skaust upp í stúku. Hann sá eftir þessu og afsakaði sig á Twitter eftir leikinn.

„Óska félaginu til hamingju. Afsaka að hafa kostað liðið annað markið en vil aðallega afsaka að brúsi sem ég sparkaði í lenti í stúkunni, það var ekki áætlunin," skrifaði Sanson.