Gareth Southgate þarf að finna lausn á vandamálum enska landsliðsins fyrir HM í Katar
Enska karlalandsliðið féll niður í B-deild Þjóðadeildarinnar í kvöld eftir að hafa tapað fyrir Ítalíu, 1-0, á San Síró-leikvanginum í Mílanó, en liðið hefur ekki skorað úr opnu spili í keppninni þegar einn leikur er eftir.
Það hefur lítið gengið hjá enska landsliðinu síðan liðið tapaði fyrir Ítölum í úrslitaleik Evrópumótsins á síðasta ári.
Liðið hefur tapað þremur af fimm leikjum sínum í Þjóðadeildinni og aðeins skorað eitt mark.
Það mark skoraði Harry Kane úr vítaspyrnu í 1-1 jafntefli við Þýskaland en sjö klukkustundir eru síðan liðið skoraði úr opnu spili.
Aðeins tveimur þjóðum hefur mistekist að skora úr opnu spili í Þjóðadeildinni; England og San Marínó. Ekkert sérstakur hópur sem enska landsliðið er í þar en San Marínó hefur ekki enn tekist að skora í Þjóðadeildinni í ár.
England komst í undanúrslit HM árið 2018 og svo úrslitaleik EM, en það er alveg ljóst að Gareth Southgate, þjálfari liðsins, þarf að finna lausn á þessu vandamáli sem allra fyrst ef ekki á illa að fara á HM í Katar.
Athugasemdir
