Fyrstu tveir heimaleikir KR í Laugardalnum

KR mun leika fyrsti tvo heimaleiki sína í Bestu deildinni á AVIS-vellinum, heimavelli Þróttar í Laugardal. Verið er að vinna að því að leggja gervigras á heimavöll KR í Frostaskjóli og framkvæmdum verður ekki lokið fyrir mót.

Magnús Orri Schram, formaður fótboltadeildar KR, segir í samtali við mbl.is að miðað sé við að spila fyrsta heimaleikinn í Vesturbænum gegn ÍBV þann 10. maí. Hann segir að framkvæmdir séu á fullu skriði og tíðin góð.

KR-ingar þekkja heimavöll Þróttar vel en þeir léku þar tvo heimaleiki í fyrra; gegn Fram og HK.