Valdimar Þór Ingimundarson.
Arnar Gunnlaugsson, þjálfari Víkinga, segir það mjög ólíklegt að Valdimar Þór Ingimundarson verði með í úrslitaleiknum í Bestu deildinni gegn Breiðabliki á sunnudag.
Valdimar hefur verið að glíma við meiðsli og missti af leiknum gegn Cercle Brugge í Sambandsdeildinni í gær.
„Það er mjög ólíklegt að Valdimar verði með. Ég er ekki í einhverjum hugarleikjum (e. mind games) hérna," sagði Arnar á blaðamannafundi í Víkinni.
Varnarmaðurinn Oliver Ekroth hefur verið að glíma við meiðsli frá því upphafi mánaðar. „Hann fer í próf í dag og þá kemur í ljós hvort að hann nái stórleiknum eða ekki."
Halldór Smári Sigurðsson verður ekki með Víkingum þar sem hann meiddist á öxl í gær. Þá eru Pablo Punyed og Matthías Vilhjálmsson fjarri góðu gamni.
Halldór Árnason, þjálfari Breiðabliks, segir að staðan á hópnum sínum sé góð. Alexander Helgi Sigurðarson er meiddur en aðrir eru klárir í slaginn.
Athugasemdir
