Guðmundur kemur til New York City frá Norrköping í Svíþjóð þar sem hann hefur leikið frá árinu 2017. Guðmundur er 27 ára gamall miðjumaður, en óhætt er að segja að hann sé fjölhæfur. Hann getur leyst margar stöður.

„Þetta er stór ákvörðun fyrir minn feril," sagði Guðmundur við heimasíðu New York. „Ég hef bara heyrt góða hluti um félagið og ég er hæstánægður."

Hann mun spila undir stjórn Norðmannsins Ronny Deila hjá New York.

„Ég hef séð hvernig Ronny vinnur og hvernig hann vill spila fótbolta, það var stór ástæða fyrir minni ákvörðun. Hann vill halda boltanum mikið og ég elska það."

Á ferli sínum í atvinnumennsku hefur Guðmundur einnig spilað með Rosenborg og Sarpsborg í Noregi og Nordsjælland í Danmörku. Hér heima var hann hjá ÍBV og auðvitað Selfossi þar sem hann er uppalinn.

Hann á að baki fimm A-landsleiki fyrir Ísland.