„Hann er kominn með sex mörk eftir átta leiki en var með átta mörk í 76 leikjum fyrir það," segir Baldvin Már Borgarsson um Guðmund Magnússon, sóknarleikmann Fram, í Innkastinu.

Gummi Magg er sterkasti leikmaður 8. umferðar Bestu deildar karla eftir magnaða framgöngu í 3-2 sigri gegn Val þar sem hann skoraði tvívegis.

„Vel verðskuldað val. Fyrir utan að skora þessi tvö mörk og sækja vítið sjálfur þá var hann hlaupandi allan tímann og að láta ógeðslega mikið til sín taka. Skallamarkið sem hann skoraði var geggjað. Kemur á 120 kílómetra hraða og stangaði hann inn," segir Baldvin.

„Hann er með hungur og er út um allan völl, hann fer í öll návígi og er að öskra á gaurana. Hann er að taka hlaup sem ég hef ekki séð frá honum áður. Hann drífur þetta lið áfram," segir Aron Elí Sævarsson í þættinum.