Sveinn Aron Guðjohnsen spilaði allan leikinn og lagði upp sigurmarkið er Spezia lagði Salernitana að velli í síðustu umferð deildartímabilsins í Serie B.

Spezia var búið að tryggja sér sæti í umspilinu um sæti í Serie A fyrir leikinn á meðan Salernitana þurfti sigur til að komast í umspilið. Það var því mikið undir hjá heimamönnum.

Fyrri hálfleikur var hin mesta skemmtun og voru bæði lið vaðandi í færum. Cedric Gondo kom Salernitana yfir en Luca Mora náði að jafna og staðan 1-1 í hálfleik.

Í síðari hálfleik tók Spezia stjórn á leiknum og var Fabio Maistro rekinn af velli í liði heimamanna á 62. mínútu.

M'Bala Nzola gerði sigurmarkið á lokamínútunum eftir sendingu frá Sveini Aroni, sem hefur komið við sögu í fimmtán deildarleikjum á tímabilinu.

Benevento vann B-deildina í ár með miklum yfirburðum undir stjórn Filippo Inzaghi. Crotone endaði í öðru sæti og er Spezia í þriðja.

Pescara og Perugia mætast í umspilinu á hinum enda töflunnar. Annað hvort liðið fellur niður í C-deildina.