Sevilla fór í vörn og ríghélt í forystuna en hún dugði ekki til leiksloka því Iker Muniain náði að jafna eftir hornspyrnu á 76. mínútu.

Tíu mínútum síðar gerði varamaðurinn tvítugi Oihan Sancet, sem hafði verið skipt inn á völlinn nokkrum sekúndum fyrr, laglegt mark eftir stórkostlega sendingu frá Inaki Williams.

Heimamenn í Bilbao sátu því uppi sem sigurvegari að lokum og er liðið með níu stig eftir sjö umferðir. Þetta var þriðja deildartap Sevilla í röð, sem er núna með sjö stig eftir sex leiki.

Athletic Bilbao 2 - 1 Sevilla
0-1 Youssef En-Nesiry ('9)
1-1 Iker Muniain ('76)
2-1 Oihan Sancet ('86)

Atletico Madrid lagði þá Osasuna að velli í leik þar sem Joao Felix var óheppinn að skora ekki þrennu.

Felix skoraði úr vítaspyrnu undir lok fyrri hálfleiks og klúðraði hann svo annarri spyrnu í upphafi þess síðari. Báðar spyrnurnar voru fastar og fóru í sömu átt, nema að sú seinni hæfði stöngina og fór aftur út í teig.

Felix skoraði sitt annað mark á 69. mínútu og hleypti Ante Budimir lífi í leikinn á lokakaflanum með skallamarki sínu á 80. mínútu, staðan orðin 1-2.

Endakaflinn var gífurlega spennandi þar sem bæði lið fengu álitlegar sóknir en það var Lucas Torreira, miðjumaður Arsenal sem er hjá Atletico að láni, sem innsiglaði sigurinn með flottu marki eftir stoðsendingu frá Kieran Trippier.

Atletico er í þriðja sæti eftir sigurinn, með 6 stig eftir 14 umferðir. Osasuna er með 10 stig eftir 7.

Osasuna 1 - 3 Atletico Madrid
0-1 Joao Felix ('43, víti)
0-1 Joao Felix, misnotað víti ('48)
0-2 Joao Felix ('69)
1-2 Ante Budimir ('80)
1-3 Lucas Torreira ('88)

Að lokum var Diego Jóhannesson Pando ónotaður varamaður er Real Oviedo lagði Las Palmas á útivelli í B-deildinni.

Nahuel Leiva gerði tvennu fyrir Oviedo í 1-2 sigri. Mörkin skoraði hann með skömmu millibili í fyrri hálfleik.

Oviedo er með 10 stig eftir 10 fyrstu umferðir nýs tímabils.

Las Palmas 1 - 2 Real Oviedo
0-1 N. Leiva ('19)
0-2 N. Leiva ('21)
1-2 Alex Suarez ('88)