Það hefur stundum gerst að dómari sleppi því að gefa leikmanni annað gula spjaldið þegar um leikaraskap er að ræða en það var ekki þannig í gær. Chris Kavanagh, dómari leiksins, sýndi Maddison enga miskunn og sendi hann beinustu leið í sturtu.

Maddison hefur sent frá sér afsökunarbeiðni.

„Ég bið alla afsökunar á því sem gerðist. Enginn vill sjá leikaraskap í okkar fallega leik. Ég bjóst við snertingu sem kom aldrei, en það er engin afsökun. Þetta eru mistök sem ég mun læra af. Strákarnir sýndu frábæran baráttuvilja að komast aftur inn í leikinn og fara heim með verðskuldað stig," skrifaði Maddison á Instagram.

Sem betur fyrir hann þá tapaði Leicester ekki leiknum. Staðan var 1-0 fyrir Brighton þegar hann var rekinn af velli á 28. mínútu en Leicester jafnaði úr vítaspyrnu á 79. mínútu.