Tottenham tók á móti West Ham í Lundúnaslag í dag og hefði sigur komið sér vel í Meistaradeildarbaráttunni.

Þetta var fimmti leikur Tottenham á sínum nýja leikvangi en fyrstu fjórir enduðu mjög vel. Tottenham vann þá alla með markatöluna 8-0 og því þung þraut fyrir Hamrana í dag.

Heimamenn byrjuðu betur og var Son Heung-min sprækur en gestirnir komu sér inn í leikinn og komust nálægt því að skora áður en flautað var til leikhlés. Inn fór boltinn þó ekki og staðan markalaus í hálfleik.

Hamrarnir tóku leikinn í hendur sér í síðari hálfleik og skoraði Michail Antonio eftir stórkostlega sendingu frá Marko Arnautovic. Antonio varð þar með fyrsti andstæðingur Tottenham til að skora gegn þeim á nýja vellinum.

Heimamenn reyndu að jafna en það var ekki nógu mikill kraftur í sóknarleiknum. Litlu munaði að Fernando Llorente næði að jafna í uppbótartíma en boltanum bjargað við marklínuna og glæsilegur 0-1 sigur West Ham staðreynd.

Tottenham er sem fyrr í þriðja sæti úrvalsdeildarinnar, fjórum stigum fyrir ofan Arsenal í fimmta sæti. West Ham er um miðja deild, fimm stigum frá sjöunda sæti.