Spánn í dag - El Clasico titilslagur í kvöld

Fjörið byrjar fyrir hádegi þegar Sevilla tekur á móti nýliðum Osasuna. Sigur kemur Sevilla upp í þriðja sæti deildarinnar.

Athletic Bilbao, sem er búið að tapa fjórum í röð, tekur svo á móti Villarreal áður en botnlið Espanyol fær Atletico Madrid í heimsókn.

Getafe, sem er búið að tapa tveimur í röð, heimsækir svo fallbaráttulið Mallorca áður en stórleikur tímabilsins fer fram á Santiago Bernabeu.

Real Madrid tekur á móti Barcelona í gífurlega spennandi El Clasico slag enda eru liðin í harðri titilbaráttu.

Barca er með tveggja stiga forystu og hefur gengi Real verið slakt upp á síðkastið. Lærisveinar Zinedine Zidane eru búnir að tapa fyrir Levante og Manchester City og gera jafntefli við Celta Vigo síðustu vikur. Þá datt liðið úr spænska bikarnum eftir tap gegn Real Sociedad.

Heimamenn verða án Eden Hazard, Marco Asensio og Rodrygo Goes. Þá verða Luis Suarez, Ousmane Dembele, Sergi Roberto og Jordi Alba ekki í liði gestanna.

Leikir dagsins:
11:00 Sevilla - Osasuna (Stöð 2 Sport)
13:00 Athletic Bilbao - Villarreal (Stöð 2 Sport)
15:00 Espanyol - Atletico Madrid (Stöð 2 Sport 2)
17:30 Mallorca - Getafe (Stöð 2 Sport 4)
20:00 Real Madrid - Barcelona (Stöð 2 Sport)