Glódís í leiknum í kvöld
„Við lögðum upp með að vinna þennan leik en fyrst og fremst lögðum við upp með góða frammistöðu og mér fannst við sýna það í dag. Mér fannst við yfirspila þær og skorum góð mörk og hefðum getað skorað fleiri og er ég bara gríðarlega ánægð með daginn og leikinn.“ Sagði Glódís Perla Viggósdóttir miðvörður Íslands um leikinn eftir 6-0 sigur Íslands á Hvíta Rússlandi á Laugardalsvelli fyrir framan rúmlega 4500 áhorfendur fyrr í kvöld.
Lestu um leikinn: Ísland 6 - 0 Hvíta-Rússland
Sara Björk Gunnarsdóttir fyrirliði Íslands gerði tvö fyrstu mörk Íslands í leiknum og aðspurð sagði Glódís um það að sjá þennan frábæra leikmann blómstra aftur á Laugardalsvelli auk frammistöðu annara leikmanna sem áttu frábæran dag sagði hún.
„Ótrúlega gaman að sjá Söru skora þessi tvö mörk og geggjað fyrir hana. Svolítið svona "she´s back" fílíngur. Amanda átti frábæran leik og mér fannst Dagný líka frábær og Sveindís og mér fannst við spila ótrúlega vel sem lið í dag. Mér fannst við finna svæðin sem voru opin og keyra á þær.“
Um 4500 manns voru á vellinum í kvöld og létu vel í sér heyra á vellinum. Um stuðninginn og stemminguna sagði Glódís.
„Hann var ótrúlega góður. Ég veit ekki hvort það var afþví að það var lítið að gera hjá mér en ég heyrði ótrúlega mikið í Tólfunni og öllum stuðningsmönnunum. Þannig að það var bara ótrúlega gaman að finna þennan auka stuðning og þetta extra ýta í bakið þegar maður var að fara inn í aðra bolta og svona.“
Sagði Glódís en allt viðtalið má sjá hér að ofan þar sem hún ræðir leikinn frekar og komandi daga auk verkefnisins sem bíður í Hollandi.
