Selfoss gerði sér góða ferð til Akureyrar og lagði Þór 2-0 í Lengjudeildinni í kvöld. Gary Martin fyrirliði liðsins spjallaði við Fótbolta.net eftir leikinn.
Lestu um leikinn: Þór 0 - 2 Selfoss
„Við erum ánægðir með sigur. Þetta er erfiðasti staðurinn til að koma og spila fótbolta fyrir mig, fimm tíma ferðalag með rútu, þetta er alltaf erfiður leikur. Þeir spila mikið af löngum boltum, við náðum í þrjú stig og erum ánægðir með það,"
Þórsliðið var mun meira með boltann í leiknum en gekk erfiðlega að skapa sér nógu góð færi.
„Ef maður skorar fyrsta markið þá breytir það leiknum, við vorum mjög slakir í dag, þetta var versti leikurinn okkar á tímabilinu en við vinnum samt 2-0 svo við verðum að vera sáttir, við vorum hræðilegir."
Gary uppskar eitt gult spjald í leiknum og hefði hæglega getað fengið fleiri, hann játar það.
„Ég var klárlega slakasti maðurinn á vellinum. Ég hefði kannski átt að fá rautt spjald. Ég hefði ekki getað mótmælt því, ég ætlaði að taka aukaspyrnu en þeir stóðu fyrir og dómarinn gerði ekkert í því. Leikmenn Þórs trylltust og svo fæ ég gult."
„Í seinna atvikinu renn ég þegar ég pressa boltann, fyrir mér er það ekki gult en hann hefði getað gefið mér spjald. Ég var heppinn að hafa verið áfram inná, þess vegna tók Deano mig útaf eftir 70 mínútur,"