„Þetta var rosalega gott að ná fyrsta sigrinum. Við vissum að frammistaðan hefur verið þarna, við höfum bara ekki verið að klára færin okkar og gera klaufaleg mistök þannig úrslitin hafa ekki verið að detta. Við vissum að ef við myndum halda frammistöðunni eins og hún er búin að vera og spila okkar leik. Þá myndi þetta detta á endanum," sagði Viktor Jónsson leikmaður ÍA eftir 2-1 sigur gegn Stjörnunni.
Lestu um leikinn: Stjarnan 1 - 2 ÍA
Viktor skorar sigurmarkið á 87. mínútu eftir að hafa fengið boltann við miðlínu og það voru engir Stjörnumenn í vörn.
„Ég tók eftir því að varnarlínan var helvíti framarlega og það var þarna pláss á bakvið. Sem betur fer vann Haukur boltann og sá hlaupið. Þannig ég bara reyndi að nýta mér þessa stöðu sem kom upp og það gekk upp," sagði Viktor.
Þetta var fyrsti sigurleikur ÍA á tímabilinu, og spurning hvort þetta geti gefið þeim þá vítamín sprautu sem þá hefur vantað.
„Þegar úrslitin fara að detta með góðri frammistöðu. Þá boðar það gott, en við verðum bara að halda okkur á jörðinni. Það er leikur á föstudaginn og mótið bara rétt að byrja, þannig við keyrum bara á þetta á fullri ferð og byggjum ofan á þetta," sagði Viktor.
