Franski landsliðsmaðurinn Kylian Mbappe mun missa af leik Paris Saint-Germain gegn Angers í frönsku úrvalsdeildinni á morgun.
Mbappe meiddist aftan í læri í águst og eru þau meiðsli enn að stríða honum.
Hinn tvítugi Mbappe kom inn á sem varamaður gegn Bordeaux um síðustu helgi og lagði upp sigurmarkið fyrir Neymar. Hann kom einnig inn á sem varamaður þegar PSG vann 1-0 sigur á Galatasaray í Meistaradeildinni í vikunni. Hann spilaði þá um hálftíma.
Hann mun hins vegar ekki spila á morgun.
„Það er ekki möguleiki fyrir hann að spila á morgun," sagði Thomas Tuchel, þjálfari PSG.
Tuchel telur að Mbappe verði klár í slaginn eftir nokkra daga. Framundan eru landsleikir og er Mbappe í landsliðshópi Frakklands sem mætir Íslandi eftir viku. Hvort hann verði klár í þann leik verður að koma í ljós.
Það er nú þegar ljóst að Paul Pogba, miðjumaður Manchester United, missir af leiknum gegn Íslandi.
Athugasemdir