Edwards: Ekki hugmynd um hvenær á að dæma hendi

Luton hefur verið að gera frábæra hluti að undanförnu og því kemur þetta tap gegn botnliði deildarinnar á óvart.

„Þetta var erfiður dagur fyrir okkur, það eru vonbrigði að tapa þessum leik. Þeir vörðust mjög vel og refsuðu okkur fyrir mistökin sem við gerðum. Við vorum ólíkir sjálfum okkur og áttum erfitt með að skapa færi," sagði Edwards.

„Strákarnir gáfu allt í þetta en við fundum ekki leið í gegnum varnarmúrinn þeirra. Við erum í erfiðustu deild í heimi og í dag áttum við slæman dag, en við höfum verið að eiga góða daga upp á síðkastið. Strákarnir munu ná sér eftir þetta og mæta sterkari til leiks í næstu viku."

Sheffield skoraði úr vítaspyrnu í fyrri hálfleik og minnkaði Carlton Morris muninn með marki úr víti í upphafi síðari hálfleiks, báðar vítaspyrnurnar voru dæmdar vegna hendi innan vítateigs.

„Að mínu mati þá átti hvorugt atvikið að vera vítaspyrna, ég hef ekki hugmynd um hvenær á að dæma hendi og hvenær ekki."

Luton er með 20 stig eftir 23 umferðir, einu stigi fyrir ofan fallsvæðið.

Sheffield vermir botnsæti úrvalsdeildarinnar með 13 stig.