Championship: Svakaleg toppbarátta - Guðlaugur Victor ekki með í fyrsta útisigrinum

Leeds United tapaði óvænt gegn Portsmouth um helgina og missti toppsætið til Sheffield United. Liðið endurheimti toppsætið í kvöld.

Leeds komst yfir snemma leiks þegar Jake Cooper varð fyrir því óláni að skora sjálfsmark. Það var síðan Ao Tanaka sem innsiglaði sigur Leeds undir lok leiksins.

Portsmouth tókst hins vegar ekki að fylgja eftir sigrinum gegn Leeds. Liðið fékk Plymouth í heimsókn en Guðlaugur Victor Pálsson sem var valinn í íslenska landsliðshópinn í dag var ekki í leikmannahópi Plymouth.

Plymouth komst yfir undir lok fyrri hálfleiks og Ryan Hardie skoraði annað mark liðsins í upphafi seinni hálfleiks. Plymouth var manni færri síðustu mínúturnar og Portsmouth tókst að klóra í bakkann.

Stoke fjarlægðist fallbaráttuna með sigri á Blackburn sem hefur ekki unnið í fjórum síðustu leikjum. Hull lagði Oxford í botnbaráttuslag og Watford lagði Swansea.