Alexandra Jóhannsdóttir í leiknum gegn Ítölum
Það var stutt á milli í þessu þegar Ísland og Ítalía gerðu 1-1 jafntefli í annarri umferð Evrópumótsins í dag.
Lestu um leikinn: Ítalía 1 - 1 Ísland
Ísland leiddi í hálfleik, 1-0, eftir mark Karólínu Leu Vilhjálmsdóttir, en Ítalír jöfnuðu eftir rúman klukkutíma. Ítalska liðið gat vel gert út um leikinn ef það hefði ekki verið fyrir Söndru Sigurðardóttur í markinu.
„Pirrandi að hafa fengið þetta mark á sig, það er svona fyrsta sem kemur upp í hausinn á manni," sagði Alexandra Jóhannsdóttir, sem var að spila sinn annan leik á stórmóti fyrir Ísland.
„Hann var smá kaflaskiptur, þær kannski meira með boltann og betri aðilinn. Það er svosem ekkert skrítið, við skorum á þriðju mínútu og augjóslega fer maður að halda eftir það."
„Já og nei, mér fannst við halda þeim ágætlega frá markinu okkar í fyrri hálfleik og svo eftir að þær skoraði og við fórum að stíga ofar þá opnaðist meira fyrir þær."
„Þetta er enn í okkar höndum. Við höfum ekki enn tapað leik og það gera sér ekki allir grein fyrir því. Þetta eru engar smáþjóðir sem við erum að spila við. Tvö stig og enn allt opið."
Alexandra kom inná sem varamaður í síðari hálfleiknum og kom sér í dauðafæri eftir aukaspyrnu en skot hennar lak framhjá stönginni. Ítalir jöfnuðu aðeins mínútu síðar. Hún segir að það þýðir ekkert að grenja mikið meira yfir þessu og nú sé bara að rífa sig í gang.
„Já, ætli ég fari ekki aðeins með þetta á koddann í kvöld og svo getur maður ekkert verið að grenja mikið meira yfir þessu. Það er bara að rífa sig í gang og næsti leikur, það er ekkert auðveldari andstæðingur. Ég má svekkja mig í kvöld og svo verð ég að rífa mig í gang," sagði hún ennfremur en viðtalið má sjá í heild sinni hér fyrir ofan.
