Birkir Már um ákvörðun Hamren: Þetta kom manni á óvart

„Ég held að við höfum allir haft gott af því að fá smá pásu af deildinni og það er frábært að byrja seinni hlutann af mótinu frábærlega. Mér fannst við ná upp gamla Valsspilinu og gamla Valsliðið koma til baka. Við héldum boltanum vel og vorum að skapa helling af hálf sénsum og einhverjum góðum sénsum í fyrri hálfleik og í seinni hálfleik fannst mér við keyra yfir þá," sagði Birkir Már sem er nýkominn úr landsliðsverkefni með íslenska landsliðinu.

Þar var Birkir Már óvænt ekki valinn í hóp hjá íslenska landsliðinu í leikjunum gegn Albaníu og Tyrklandi eftir að hafa verið lykilmaður í varnarlínu Íslands undanfarin ár.

„Það var hundleiðinlegt að fá ekki að vera með. Þeir stóðu sig hinsvegar vel strákarnir og fyrst maður er ekki valinn í hópinn þá styður maður þá sem eru með og reynir að gera sitt besta í því. Kem síðan til baka hingað og reyni að gera þetta almennilega í staðin," sagði Birkir sem viðurkennir að þetta hafi komið honum á óvart.

„Þetta kom manni á óvart og ég var fúll yfir því en maður þarf bara að sýna það á vellinum að maður eigi heima í þessum hóp."

Valur mætir KR næst í 9. umferðinni á miðvikudaginn.