Fótbolti.net

þri 17. janúar 2023 13:27

Elvar Geir Magnússon

Marsch spurður út í stöðu Leeds, Sinisterra, Rutter og fleira

Luis Sinisterra í leik með Leeds.

Mynd: EPA

Georginio Rutter.

Mynd: Leeds

Leeds og Cardiff mætast á morgun í endurteknum leik í FA-bikarnum. Jesse Marsch stjóri Leeds fór yfir ýmis mál, þar á meðal meiðslastöðunam, á fréttamannafundi í dag.

Hann sagði meðal annars frá endurkomu Luis Sinisterra en þessi 23 ára kólumbíski vængmaður meiddist gegn Fulham í október.

„Luis Sinisterra leit frábærlega út á æfingu í gær og við erum spenntir yfir því að fá hann til baka," segir Marsch.

„Adam Forshaw, Stuart Dallas og Archie Gray verða allir frá í þessum leik. Þá er Liam Cooper tæpur. Hann varð fyrir furðulegum hnémeiðslum á æfingu í gær, sjáum hvað gerist."

Um Patrick Bamford sem er kominn aftur í leikmannahópinn eftir nárameiðsli:
„Honum líður vel en við þurfum að sýna skynsemi og taka ekki neina áhættu með hann. Líkamlega og andlega virðist hann í góðum málum. Ég veit ekki hvort hann byrji á morgun," segir Marsch.

Dínamískur leikmaður
Leeds gekk um helgina frá kaupum á Georginio Rutter, tvítugum frönskum sóknarmanni frá Hoffenheim, á 35 milljónir punda. Marsch tjáði sig um nýja leikmanninn.

„Ég fylgdist lengi með Georginio og tel að hann sé dínamískur leikmaður með mikla hæfileika og svigrúm til að verða enn betri. Hann er jafnvígur á báða fætur. Við höfum komist að því hversu mikið hann er tilbúinn að leggja á sig og hversu mikið hann vill afreka. Ég er bjartsýnn á að hann verði fljótur að aðlagast," segir Marsch.

Um leikinn á morgun
Bikarleikur Leeds og Cardiff verður klukkan 19:45 annað kvöld.

„Ég tek bikarleikjum alltaf alvarlega. Byrjunarliðið í fyrri leiknum gegn Cardiff hefði verið það sama ef við hefðum verið að spila deildarleik. Við gáfum tvö mörk í síðasta leik en við getum tekið það jákvæða úr tapinu gegn Aston Villa og sýnt að við erum tilbúnir fyrir þessa mikilvægu leiki sem eru framundan," segir Marsch.

Vonbrigði að liðið hafi ekki þróast hraðar og betur
Í ensku úrvalsdeildinni situr Leeds í fjórtánda sæti og er aðeins tveimur stigum frá fallsæti.

„Ég skil þá pressu sem er á mínu starfi sem stendur. Ég get bara sagt að ég er brattur og bjartsýnn. Ég er óánægður með að við höfum ekki þróast hraðar og betur. Það er mín ábyrgð. Ég þarf að finna leið til að við bætum okkur hraðar," segir Marsch.

		L	U	J	T	ms:	mf:	mun	Stig
1	Arsenal	38	26	7	5	71	27	+44	85
2	Man City	38	23	9	6	77	35	+42	78
3	Man Utd	38	20	11	7	69	50	+19	71
4	Aston Villa	38	19	8	11	56	49	+7	65
5	Liverpool	38	17	9	12	63	53	+10	60
6	Bournemouth	38	13	18	7	58	54	+4	57
7	Sunderland	38	14	12	12	42	48	-6	54
8	Brighton	38	14	11	13	52	46	+6	53
9	Brentford	38	14	11	13	55	52	+3	53
10	Chelsea	38	14	10	14	58	52	+6	52
11	Fulham	38	15	7	16	47	51	-4	52
12	Newcastle	38	14	7	17	53	55	-2	49
13	Everton	38	13	10	15	47	50	-3	49
14	Leeds	38	11	14	13	49	56	-7	47
15	Crystal Palace	38	11	12	15	41	51	-10	45
16	Nott. Forest	38	11	11	16	48	51	-3	44
17	Tottenham	38	10	11	17	48	57	-9	41
18	West Ham	38	10	9	19	46	65	-19	39
19	Burnley	38	4	10	24	38	75	-37	22
20	Wolves	38	3	11	24	27	68	-41	20