Richarlison kom Everton yfir snemma í síðari hálfleik en boltinn barst til Brassans eftir klafs sem að myndaðist í teig Chelsea eftir hornspyrnu Gylfa Þórs Sigurðssonar.

Everton fékk vítaspyrnu á 72. mínútu þegar Marcos Alonso braut á Richarlison innan vítateigs.

Gylfi Þór Sigurðsson fór á vítapunktinn en hann lét Kepa Arrizabalaga verja frá sér, það kom þó ekki að sök því að Kepa missti boltann út í teiginn og Gylfi náði frákastinu og skoraði. Fleiri mörk voru ekki skoruð í leiknum og 2-0 sigur Everton staðreynd.

Gífurlega mikilvægur sigur fyrir Everton-liðið sem hefur verið í allskonar vandræðum undanfarnar vikur. Chelsea er nú þremur stigum frá fjórða sætinu.