Aganefnd KSÍ dæmdi Emmanuel Eli Keke, leikmann Víkings Ólafsvík, í tveggja leikja bann eftir rauða spjaldið sem hann fékk gegn Aftureldingu í Lengjudeildinni á föstudaginn.

Ólsarar eru alls ekki sáttir við niðurstöðu aganefndarinnar og segja að rangur leikmaður hafi verið rekinn af velli.

„Bæði leikmenn og þjálfarar beggja liða auk áhorfenda sáu það nokkuð greinilega að dómarar leiksins ráku ekki réttan mann af velli. Dómararnir virtust ekki sammála um það úti á vellinum hvernig bregðast ætti við í málinu en að lokum tóku þeir ákvörðun sem að okkar mati er kolröng," segir Þorsteinn Haukur Harðarson, framkvæmdastjóri Víkings Ólafsvíkur.

„Dómarar geta auðvitað gert mistök eins og við allir en það sem við erum fyrst og fremst óánægðir með er sú staðreynd að aganefndin haldi rauða spjaldinu þrátt fyrir greinagerð félagsins og myndbandsupptöku af atvikinu."

Dómararnir töldu að Keke hefði hrint andstæðingi en Ólsarar segja að það hafi verið markvörður liðsins, Konráð Ragnarsson. Atvikið má sjá í spilaranum hér að ofan.

En af hverju fær Keke tveggja leikja bann?

„Í úrskurði aganefndar er talað um að bannið sé tveir leikir vegna ofsalegrar framkomu. Ég hreinlega veit ekki hvort þeir séu þar að tala um brotið sem hann framdi ekki eða óánægjuna sem fylgdi því að vera rekinn af velli fyrir brot sem hann framdi ekki."

„Í skýrslu dómara er tekið fram að leikmaðurinn hafi verið meira en eina mínútu að koma sér af vellinum og látið einhver misfalleg orð flakka. Auðvitað eiga leikmenn að sýna háttsemi á vellinum og virða dómarann eins og aðra þátttakendur leiksins en að sama skapi skil ég óánægju leikmannsins ákaflega vel þar sem hann fékk að gjalda fyrir mistök dómarateymisins," segir Þorsteinn.